قالیباف نے اسکاٹ بیسنٹ اور پیٹ ہیگستھ کو ناموزوں قرار دے دیا

ایران کی پارلیمان کے اسپیکر اور چیف مذاکرات کار محمد باقر قالیباف نے امریکی وزیرِ خزانہ اسکاٹ بیسنٹ اور وزیرِ جنگ پیٹ ہیگستھ کو مسخرہ ٹولہ قرار دے دیا ہے۔

باقر قالیباف کا کہنا ہے کہ امریکی حکام کا خیال ہے کہ ایران پر مزید دباؤ ڈال کر اسے ایسی رعایتیں دینے پر مجبور کیا جا سکتا ہے جو کبھی کسی معاہدے کا حصہ نہیں رہیں۔

انھوں نے دونوں امریکی شخصیات کا نام لیتے ہوئے ایکس پوسٹ میں لکھا کہ یہ دونوں معاملے کے لیے موزوں نہیں ہیں، امریکی انتظامیہ کو پہلے اپنے پیدا کردہ مسائل حل کرنے چاہئیں۔

ایکس پر اپنی پوسٹ میں باقر قالیباف نے لکھا ’’امریکی سمجھتے ہیں کہ ایران پر مزید دباؤ ڈالنے سے وہ ایسی رعایتیں حاصل کر لیں گے جو کبھی معاہدے کا حصہ ہی نہیں تھیں۔ بیسنٹ اور ہیگسیتھ اپنی اہلیت اور تجربے کی حدود سے بہت باہر کام کر رہے ہیں۔‘‘

انھوں نے مزید لکھا ’’اس مسخرہ ٹولے کے کوئی کرشمہ دکھا کر اچانک مسئلہ حل کر دینے کا انتظار بند کریں اور جو گڑبڑ آپ نے خود پیدا کی ہے، اسے خود ہی درست کریں۔‘‘